केही वर्ष अगाडि भारतको देहरादूनमा सडक दुर्घटनामा पर्नु भएकी अभिनेत्री, मोडल निशा घिमिरेलाई नेपालमा ल्याएपछि नवजीवन परोपकार समाजको पहलमा मेघा चौधरी मार्फत नर्भिक अस्पतालमा निःशुल्क उपचार भएको थियो । ५/६ महिनाको उपचार पछि उपचाररत अवस्थामा नै मोडल निशा घिमिरेको २०७८ भदौ १६ गते निधन भएको थियो । निशा घिमिरे उपचाररत अवस्थामा नै देश विदेशमा रहनु भएका शुभेच्छुक सहृदयी दाताहरुले निशाको सिघ्र स्वास्थ्य लाभको कामना गर्दै सहयोग रकम पठाउनु भएको र गत वर्ष स्व. निशा घिमिरेको नाममा नवजीवन परोपकार समाज र नेपाल चलचित्र कलाकार संघको पहलमा एउटा संरक्षण कोष गठन गरिएको थियो ।निशा घिमिरे स्मृति कोषमा  दुर्गानाथ दाहाल, मोहन निरौला र स्व. निशा घिमिरेकी दिदी  उषा घिमिरे हुनुहुन्छ । 

सोही निशा घिमिरे स्मृति कोषको २०७९ श्रावण १४ गते बसेको बैठकले स्थापना वर्षको निशा घिमिरे स्मृति पुरस्कार अभिनेत्री, मोडल तथा कोरियोग्राफर  पवित्रा आचार्य र मोडल  उषा उप्रेतीलाई (जनही २५ हजार रकम र सम्मानपत्र) प्रदान गर्ने निर्णय गरेको थियो भने सो पुरस्कार सोमबार एक कार्यक्रमका बीच प्रदान गरिएको छ ।

कोषका संयोजक  दुर्गानाथ दाहालको सभाअध्यक्षतामा होटेल हार्दिक मा सम्पन्न सो कार्यक्रममा  नर्भिक अस्पतालका  मेघा चौधरी, संचारकर्मी  प्रकाश सुवेदी र नवजीवन परोपकार समाजलाई विशेष सम्मान अर्पण गरिएको थियो । सो कार्यक्रममा विशिष्ट अभिनेत्री द्वय भुवन चन्द र मिथिला शर्मा , चलचित्र कलाकार संघका अध्यक्ष रविन्द्र खड्का र विश्व कीर्तिमानी संगीतकार सन्तोष श्रेष्ठको विशिष्ट आतिथ्यता रहेको थियो ।  

शुभेच्छुक दाता र रजतपटका संचालक संचारकर्मी प्रकाश सुवेदीको सक्रियतामा कोषमा जम्मा हुन आएको रकमलाई निशा घिमिरे दिवंगत हुनु भएपछि अक्षय कोषमा राखि प्रत्येक वर्ष एक जना मोडल र एकजना अभिनेत्रीलाई निशा घिमिरे स्मृति पुरस्कार दिने निर्णय भए बमोजिम यस वर्षको पुरस्कारअभिनेत्री, मोडल तथा कोरियोग्राफर  पवित्रा आचार्य र मोडल  उषा उप्रेतीलाई प्रदान गर्ने निर्णय गरिएको  कुरा निशा घिमिरे स्मृति कोषका  सदस्य सचिव मोहन निरौलाले स्वागत मन्तव्य  राख्ने क्रममा जानकारी दिनु भयाे ।

Categorized in साहित्य-कला