ललेन्द्र शाक्य

---

कोरोना भाइरस कोभिड १९ को संक्रमण रोकथाम तथा नियन्त्रण गर्न सरकारले देशभर लकडाउन गरेको आज ५३ दिन पुगिसक्यो । लकडाउनले देशका सम्पूर्ण शहरबस्ती ठप्प भइरहेको छ । लकडाउनका कारण दैनिक ज्यालादारी गर्ने मजदूर, गरिबी, असहाय, विपन्न वर्गहरुलाई बिहान बेलुकी पेट भर्न धौधौ परिरहेको अवस्था छ । ती वर्गलाई पेट भर्नु नै हाल भइरहेको लकडाउनले चुनौती दिइरहेको छ । यस समस्यालाई मध्यनजर गरी एक महिनायता वुमेन फर हुमन राइट्स (डब्ल्यूएचआर) मानवअधिकारको लागि महिला एकल महिला समूहले ती समुदायलाई निःशुल्क खानाको व्यवस्था गर्दै आइरहेको जानकारी दिदैं उक्त समूहकी ललितपुर जिल्ला अध्यक्ष सविता महर्जनले यो महिनाको अवधिसम्म ३० हजार भन्दा बढी व्यक्तिहरुलाई निःशुल्क खाना खुवाइसकेको जानकारी दिनुभयो । उहाँले उक्त समूहबाट खानाका साथसाथैं निःशुल्क स्वास्थ्य शिविरको पनि आयोजना गर्दै आइरहेको जानकारी दिनुभयो । अन्तर्राष्ट्रिय नर्सिङ्ग दिवसको अवसरमा उक्त एकल महिला समूहले नेपाल पुलिस अस्पताल महाराजगञ्ज तथा स्वास्थ्य एट होमको सहयोगमा स्वास्थ्य शिविर आयोजना गरेको संस्थाकी केन्द्रीय संस्थापक अध्यक्ष लीली थापाले जानकारी दिनुभयो । उहाँका अनुसार उक्त स्वास्थ्य शिविरमा महिला स्तनपान गराउने आमाहरु, गर्भवती महिला तथा बालबालिकादेखि ज्येष्ठ नागरिक, अपाङ्गता भएका व्यक्तिलगायत सर्वसाधारणहरुले सेवा लिएका थिए । उक्त स्वास्थ्य शिविरमा डा. विशाल ढकाललगायत उहाँका टिमले सेवा प्रदान गर्नुभएको थियो । लकडाउनको समयमा पनि स्वास्थ्यको विशेष ख्याल एवं हेरचाह गर्नुपर्ने उद्देश्यका साथ निःशुल्क स्वास्थ्य शिविरको आयोजना गरिएको समूहकी सदस्य एवं ललितपुर जिल्ला समिति एकल महिला समूहकी अध्यक्ष तथा प्रदेश ३ का सचिव सविता महर्जनले जानकारी दिनुभयो । एकल महिला भए पनि ज्यानको बाजी थापेर हालको लकडाउनको समयमा पनि समस्या तथा मर्कामा परिरहेको दिनदुःखी एवं व्यक्तिहरुलाई सहयोगी कदमहरु चालिराखेको विचार महर्जनले राख्नुभयो । उक्त समूहले लकडाउनमा समस्यामा परिरहेका अति विपन्न परिवारलाई मात्र नभई सुत्केरी महिलाहरुलाई पनि काठमाडौंको बुढानिलकण्ठ नगरपालिका वडा नम्बर ७ हात्तीगौंडामा अवस्थित छहारी भवनमा निःशुल्क खानाको व्यवस्था गर्दै आइरहेको छ । लकडाउन अवधिभर बेलुकाको ४ देखि ६ बजेसम्म बुढानिलकण्ठ नगरपालिकाभित्रका विपन्न परिवारलाई सामाजिक दूरी कायम राख्दै बेलुकाको खाना उपलब्ध गराइँदै आइरहेको जानकारी समूहकी केन्द्रीय संस्थापक अध्यक्ष लीली थापाले दिनुभएको छ । ३० हजारभन्दा बढी व्यक्तिहरुलाई खाना खुवाइसकेको जानकारी दिनुहुँदै ललितपुर जिल्ला समितिका एकल महिला समूहकी अध्यक्ष सविता महर्जनले उक्त सहयोगी कार्यको लागि विभिन्न संघसंस्था एवं समाजसेवी व्यक्तित्वहरुले भित्री हृदयदेखि सहयोग गर्दै आइरहनुभएको र स्वयं आफूले पनि सक्दो सहयोग गर्दै पाईला चालिरहेको जानकारी दिनुभयो । Categorized in उपत्यका