कांग्रेस महामन्त्रीमा गगन थापा र विश्वप्रकाश शर्मा निर्वाचित
Janjati Khabar – Janjati Khabar | २०७८ पौष १, बिहिबार
१ पुस, काठमाडौं - नेपाली कांग्रेसको महामन्त्रीमा गगन थापा र विश्वप्रकाश शर्मा निर्वाचित भएका छन् ।
कांग्रेस महामन्त्रीको दुई पदमा ६ जनाले उम्मेदवारी दिएकामा थापा र शर्मा विजयी भएका हुन् । मत गणना नसकिँदै थापा र शर्मा निर्वाचित भएका हुन् । अब २८१ मत गणना गर्न बाँकी रहँदा थापा र शर्मा दुवैले त्यो भन्दा बढीको अग्रता लिएका छन् ।
मतगणना अन्तिम चरणमा प्रवेश गर्दा गगन झन्डै २ तिहाइ मत ल्याएर विजयतर्फ अग्रसर छन् भने विश्वप्रकाशले पनि तेस्रो स्थानमा रहेका उम्मेदवार प्रकाशशरण महतसँग मतान्तर बढाएका छन्। अहिलेसम्म ४३९० मत गन्दा गगनले २८२३ मत पाएका छन्। यो मत १४ औं महाधिवेशनमा कुनै उम्मेदवारले अहिलेसम्म पाएको मतमध्ये सर्वाधिक हो।
दोस्रो चरणमा सभापति जितेका प्रधानमन्त्री शेरबहादुर देउवाले २७३३ मत पाएका थिए। उपसभापतिमा सबैभन्दा बढी मत पाएका पूर्णबहादुर खड्काले २१२१ मत पाएका थिए। महामन्त्रीमा अर्का उम्मेदवार विश्वप्रकाश शर्मा पनि जितनजिक पुगेका छन्। उनले १८२४ मत पाएका छन्।
त्यस्तै महामन्त्रीका उम्मेदवार प्रकाशशरण महतले १५५६ मत पाएका छन् भने प्रदीप पौडेलले १३९३, मिनेन्द्र रिजालले ८०९ र राजाराम कार्कीले १०६ मत प्राप्त गरे ।
महामन्त्रीको मतगणना सकिएपछि सहमहामन्त्रीको मतगणना हुनेछ। पदाधिकारीको मतगणना सकिएपछि केन्द्रीय सदस्यको मतगणना हुनेछ।
थापा सभापतिका उम्मेदवार डा. शेखर कोइराला प्यानलका हुन् भने शर्मा प्रकाशमान सिंह प्यानलका हुन् ।
Categorized in राजनीति
