ललितपुर महानगरपालिका– १६ वडाले अरनिको समाजसंग मिलेर  आयोजना गरेको निःशुल्क स्वास्थ्य शिविर अभियानको क्रममा गत साता नशा तथा हाडजोर्नी परीक्षण गरिएकोमा यस पटक मुटुको परीक्षण गरिएको थियो ।   उच्चरक्त चाप र मधुमेह गर्दा   हृदय रोगीहरुको संख्या बढ्दै गएकोमा चिन्ता प्रकट गर्दै चिकित्सकहरुले जीवनशैलीमा परिर्वतन गर्नुपर्नेमा जोड दिएका छन् ।

शनिबार बुबहालमा आयोजित बृहत निःशुल्क स्वास्थ्य शिविरमा  ह्रृदय रोगीहरुको स्वास्थ्य परीक्षण गर्दै उनीहरुले सो कुरामा जोड दिएका हुन् । 

जीवनशैलीलाई परिर्वतन गरी आहार, विहारको नियन्त्रण र व्यायाम जोड्न सकेन भने  ह्रृदय रोगीहरुको संख्या झन् बढ्दै जाने छ भन्ने कुरा  स्वास्थ्य परीक्षणपछि डा. दीपक मिश्रले भन्नुभयो । शिविरमा मधुमेह र उच्चरक्त चापले गर्दा  ह्रृदय रोग भएका बिरामी र भर्खर भर्खर औषधी सेवन गर्न थालेका गरी ८३ जना बिरामीहरुको स्वास्थ्य परीक्षण गरिएको थियो । 

एलडीएल कोलेस्टोरले गर्दा मुटुमा समस्या भएका बिरामीहरुले पनि स्वास्थ्य परीक्षण गराएका थिए । स्वास्थ्य सम्बन्धी चेतना जगाउन सकेन भने मुटुरोगीहरुको संख्या बढ्दै जाने बताउँदै डा. मिश्र, डा. कृृष्णगोपाल महर्जन, डा. उर्मिला शाक्यले महानगरपालिका र वडाले चेतनामूलक कार्यक्रम ल्याउनुपर्ने खाँचो औल्याउनुभयो । शिविरमा औषधी पनि निशुल्क वितरण गरिएको थियो भने ईसीजी पनि गरिएको थियो । सो अवसरमा अरनिको समाजका महासचिव डा. सुशील प्रजापतिले शिविरमा स्वास्थ्य परीक्षण गराएका बिरामीहरु थप उपचारको लागि ललितपुर सामुदायिक हदयरोग सेवा केन्द्र मणिडोलमा आएमा २० प्रतिशत छुट दिने घोषणा गर्नुभयो ।

स्वास्थ्य सेवालाई सबैको पहुँच योग्य बनाउने र आर्थिकस्तर कमजोर भएका मानिसहरुमा स्वास्थ्य सेवा पुर्याउने उद्देश्यले अभियानकैै रुपमा शिविर आयोजना गरिएको वडाअध्यक्ष निर्मलरत्न शाक्यले बताउनुभयो । वडाअध्यक्ष शाक्यका अनुसार शिविरबाट १६ वडाका साथै आसपासका वडाहरु क्रमशः ९, ११, १२, १९ र २० का मानिसहरु पनि लाभान्वित भएका छन् ।

आउँदो शनिबार बालिफल (अशोक हलमा) बाल छाला तथा आँखा रोग सम्बन्धी शिविर, फागुण ८ गते नागबहालमा स्त्री रोग सम्बन्धी शिविर, फागुण १५ गते दौबहालमा पेट तथा कलेजो सम्बन्धी शिविर, फागुण २२ गते मंगलबजारमा ज्येष्ठ नागरिकहरुको लागि नशा, युरोलोजी, मधुमेह र जनरल सम्बन्धी शिविर सञ्चालन हुने छ । समाजका अनुसार स्त्री रोग सम्बन्धी जाँचमा ४५ वर्ष भन्दा माथिका महिलाहरुको पायस्प्समेर निःशुल्क परीक्षण गरिने कुरा ललितपुर   वडा  १६ का अध्यक्ष शाक्यले बताउनु भयो ।

Categorized in स्वास्थ्य-मौसम