देय्न्यंकंया नेवाःतय्गु मंकाःगु राष्ट्रिय संगठन नेवाः देय् दबू व देय्न्यंकंया नेवाः पत्रकारपिनिगु संगठन नेवाः पत्रकार राष्ट्रिय दबू नाप नापं जाना वनेगु खँय् निगू हे दबूया नेतृत्वया दथुइ सहलह जूगु दु । नेवाः पत्रकार राष्ट्रिय दबूया ग्वसालय् आइतवाः जूगु सहलह ज्याझ्वसं देय् दबू व पत्रकार दबूया नेतृत्वपाखें नेवाः मुद्दायात कया नाप नापं जाना थःथःगु थासं भूमिका म्हितेगु नाप नापं संगठन निर्माणया ज्याय् तकं जाना वनेमाःगु खँय् सहलह ब्याकूगु खः । 

येँय् जूगु उगु ज्याझ्वलय् नेवाः देय् दबूया न्हू निर्वाचित जुयादीम्ह नायः रश्मीला प्रजापतिं आःया अवस्थाय् नेवाः पत्रकार दबू व नेवाः देय् दबू नाप नापं जाना वना नेवाःतय्गु नितिं ज्या यायेमाःगु खँय् बः बियादिल । नेवाः देय् दबू धैगु अधिकारमुखि संस्था जूगुलिं नेवाः देय् दबूपाखें जुइगु ज्या नेवाः पत्रकारपिन्सं माःगु कथं प्रचार प्रसारया नितिं ज्या यायेमाःगु खँय् बः बियादिल । 

नेवाः देय् दबूया बरिष्ठ न्वकू सत्यनारायण डंगोलं देय् दबू व पत्रकार दबूया पासापिनिगु दथुइ न्हापाया स्वापू बांलाःगु खँ न्ह्यथनादिसें आः झन क्वातुका नापं जाना वनेमाःगु खँय् बः बियादिल । 

देय् दबुया न्वकू उमेश स्थापितं दबूया विधान कथं पत्रकार दबूयात दुथ्याका यंकेफैगु प्रावधानत दु धयादिसें विषयगत समिति कथं वनेगु धैगु भातृ संगठन कथं वनेगु खँ मखु धयादिल । 

नेवाः देय् दबूया मूछ्याञ्जे श्रीकृष्ण महर्जनं नेवाः देय् दबू व नेवाः पत्रकार दबूयात नेवाः देय् दबू नाप स्वाका यंकेगु नितिं विधान कथं विषयगत समिति व संस्थागत दुजःया प्रावधान दु धयादिसें निरन्तर रुपं थुगु कथं सहलह ब्याका वनेमाःगु खँय् बः बियादिल । 

नेवाः पत्रकार राष्ट्रिय दबूया केन्द्रीय नायः नृपेन्द्रलाल श्रेष्ठं पत्रकारपिं सुयागु नं भातृ संगठन जुइ मज्यूगु खँय् बः बियादिल । पत्रकार दबूया निर्वतमान नायः सुरजवीर बज्राचार्यं पत्रकार दबू व देय् दबू निगुलिं नेवाः समुदाययात ज्या याइगु संस्था खः धयादिल ।  

पत्रकार दबूया बरिष्ठ न्वकू सुनिल महर्जनं नेवाः पत्रकार धाये धुनेवं नेवाः भासं च्वइपिं जक मखु न्ह्यागु भाषं च्वइपिं जूसां नेवाःत हे नेवाः पत्रकार खः धयादिसें नेवाः पत्रकारपिनिगु सवालय् नं देय् दबूपाखें ध्यान बिइमाः धयादिल । अथे हे नेवाः पत्रकार राष्ट्रिय दबूया मूछ्याञ्जे केके मानन्धरं नेवाः पत्रकार राष्ट्रिय दबूया स्थापना कालंनिसेंया नेवाः देय् दबूनाप स्वापू दुगु खँ न्ह्यथसें थ्व निगू हे नाप नापं वनेगुया विकल्प मदु धयादिल । 

नेवाः देय् दबूया न्हूगु निर्वाचित केन्द्रीय नेतृत्व पदाधिकारी नापं दुजःपिन्त देय्न्यंकंया नेवाः पत्रकारपिनयगु मंकाःगु संगठन नेवाः पत्रकार राष्ट्रिय दबूपाखें भिंतुनादेछासें लसकुस नापं सहलह ज्याझ्वः ग्वसाः ग्वल । 

आइतवाः जूगु उगु ज्याझ्वः नेवाः पत्रकार राष्ट्रिय दबूया नायः नृपेन्द्रलाल श्रेष्ठया नायःसुइ जूगु खः । ज्याझ्वलय् नेवाः देय् दबूया केन्द्रीय नेतृत्वपिं ल्यूछ्याञ्ज् बासु श्रेष्ठ, छ्याञ्जेपिं मचाराजा महर्जन, सिजन श्रेष्ठ, दांभरी माइला डंगोल, दुजःपिं नरेश श्रेष्ठ, शोभा बज्राचार्य महर्जन, सुदन मुनिकार, रमना श्रेष्ठ, ललिता प्रधान लगायपिं ब्वति कयादीगु खः । 

सुनिता महर्जनं न््याकादीगु उगु ज्याझ्वलय् नेवाः पत्रकार राष्ट्रिय दबूया नायः देय् दबूया केन्द्रीय पदाधिकारी व दुजःपिन्त स्वांमाः क्वखायेकादीगु खःसा निर्वचतमान नायः सुरजवीर बज्राचार्यं खादां न्ययेकादीगु व न्वकू सुरेन्द्रभक्त श्रेष्ठं पत्रकार दबूपाखें नकतिनि जक पिथंगु सुरेश किरण ग्रन्थ सफू लःल्हानादीगु खः ।

Categorized in सिनेमा