प्रदेश ५ को राजधानी दाङ बनाउने प्रस्तावविरुद्ध कांग्रेस आन्दोलनमा
Janjati Khabar – Janjati Khabar | २०७७ आश्विन १७, शनिबार
बुटवल – पाँच नम्बर प्रदेशको राजधानी दाङको भालुवाङ राख्ने प्रस्ताव अघि बढेपछि कांग्रेस रुपन्देही आन्दोलनमा उत्रिएको छ ।
शुक्रबार प्रदेशसभा बैठकमा प्रदेशका आन्तरिक मामिला तथा कानुनमन्त्रीले राजधानी र नामकरण निर्धारणसम्बन्धी कार्यविधि पेस गरेर प्रस्ताव अगाडि बढाएपछि नेपाली कांग्रेसका भातृ संगठनले विरोध प्रदर्शन गरेका हुन्।
बुटवलको मिलनचोकमा टायर बालेर प्रदर्शन गरिएको छ। नेपाली कांग्रेस सैनामैनाले पूर्वपश्चिम राजमार्गमा टायर बालेर विरोध गरेको छ। प्रदेशसभा भवन, मुख्यमन्त्री कार्यालय आसपासमा समेत विरोध भएको थियो। प्रदेशसभा भवन अगाडि कालिकापथमा एक गाडीमा समेत तोडफोड गरेको जनाइएको छ ।
कांग्रेस सभापति शेरबहादुर देउवा प्रधानमन्त्री भएका बेला बुटवललाई तोकिएको अस्थायी राजधानी सारिएको भन्दै कांग्रेसले विरोध गरेको हो । कांग्रेस जिल्ला सभापती अब्दुल रज्जाकद्वारा विज्ञप्ति जारी गर्दै बहुसंख्यक जनताको केन्द्र, पूर्वाधारका हिसाबले उपयुक्त रुपन्देहीबाट राजधानी सारेर दाङ लैजाने नेकपा सरकारको निर्णयप्रति कठोर आन्दोलन सुरु भएको जनाएका छन् ।
प्रदेश सरकारले शुक्रबार दिउँसोको प्रदेशसभा बैठकमा राजधानी दाङको भालुवाङ र नाम लुम्बिनी राख्ने प्रस्ताव पेश गरेको छ।
Categorized in राजनीति
